Anti-Money Laundering (AML) - ფულის გათეთრების აღკვეთის ღონისძიებების შემსწავლელი სასერტიფიკატო კურსი

კურსის/პროგრამის სახელწოდება: Anti-Money Laundering (AML) – ფულის გათეთრების აღკვეთის ღონისძიებების შემსწავლელი სასერტიფიკატო კურსი

კურსის/პროგრამის ხანგრძლივობა:

• კურსის ხანგრძლივობაა 4 კვირა (8 შეხვედრა; 24 საათი).

• ლექციები ჩატარდება კვირაში 2-ჯერ (სამშაბათი, პარასკევი).

• ლექციის ხანგრძლივობაა 3 საათი (19:00–22:00).

სამიზნე აუდიტორია:

პროგრამა განკუთვნილია მათთვის, ვისაც სურს დასაქმდეს ან აიმაღლოს კვალიფიკაცია AML სპეციალისტის, ოფიცრის ან მენეჯერის პოზიციაზე ფინანსურ და არაფინანსურ სექტორში.

კურსის სამიზნე აუდიტორიას წარმოადგენენ ბანკების, მიკროსაფინანსო და სადაზღვევო ორგანიზაციების, სახმელეთო და ონლაინ კაზინოების, ვალუტის გადამცვლელი პუნქტების, საგადახდო მომსახურების პროვაიდერებისა და სხვა იმ ორგანიზაციების თანამშრომლები, რომლებზეც ვრცელდება საქართველოს კანონი „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“.

პროგრამა ასევე განკუთვნილია ბუღალტრული აღრიცხვის, ანგარიშგებისა და აუდიტის ზედამხედველობის სამსახურის მიერ განსაზღვრული მომსახურების გამწევი ბუღალტრებისთვის.

კურსის/პროგრამის შესახებ:

ქართულ-ამერიკული უნივერსიტეტი (GAU) და საკონსულტაციო კომპანია Context Consulting ერთობლივად ახორციელებენ ფულის გათეთრების აღკვეთის ღონისძიებების შემსწავლელ სასერტიფიკატო პროგრამას - Anti-Money Laundering (AML).

პროგრამა შემუშავებულია საქართველოს კანონით „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ გათვალისწინებული მოთხოვნების შესაბამისად.

კურსის მიზანია ფინანსური და არაფინანსური სექტორისთვის კვალიფიციური და კონკურენტუნარიანი AML სპეციალისტების, ოფიცრებისა და მენეჯერების მომზადება, რომლებსაც ექნებათ ფულის გათეთრებისა და ტერორიზმის დაფინანსების პრევენციის, რისკების შეფასების, საეჭვო ტრანზაქციების გამოვლენისა და შესაბამისი რეგულაციების პრაქტიკაში გამოყენების ცოდნა.

GAU-ს პარტნიორი საკონსულტაციო კომპანია Context Consulting (ს/კ 402187307) რეგისტრირებულია ბუღალტრული აღრიცხვის, ანგარიშგებისა და აუდიტის ზედამხედველობის სამსახურში, როგორც ფულის გათეთრებისა და ტერორიზმის დაფინანსების აღკვეთის ხელშეწყობის მიმართულებით განგრძობითი განათლების მიმწოდებელი.

კურსი/პროგრამა მოიცავს:

• ფულის გათეთრების ისტორიული მიმოხილვა, გავრცელების ხერხები და მექანიზმები;

• საერთაშორისო ორგანიზაციები, მათი მისია და საქმიანობა, საკანონმდებლო ბაზა და რეგულაციები;

• ბენეფიციარი მესაკუთრის განსაზღვრა და მასთან დაკავშირებული საკითხები;

• კლიენტის იდენტიფიკაცია და ვერიფიკაცია, შესაბამისი დოკუმენტაცია და პროცედურები;

• ფიზიკურ და იურიდიულ პირებთან დაკავშირებული სამართლებრივი საკითხები, რეზიდენტისა და არარეზიდენტის სტატუსი;

• გარიგებების სახეები - ერთჯერადი, მრავალჯერადი, საეჭვო, ზღვარს ზემოთ განხორციელებული, დანაწევრებული და სხვა ტიპის გარიგებები;

• რისკების შეფასება, რისკზე დამყარებული მიდგომა და პროპორციული ზომები;

• რისკების შეფასების მატრიცები და „იცნობდე შენს კლიენტს“ (Know Your Customer – KYC) პრინციპი;

• თვითდეკლარაციის ფორმები და მათი გამოყენება;

• ტერორისტთა და ტერორიზმის ხელშემწყობ პირთა სიებთან დაკავშირებული საკითხები;

• პოლიტიკურად აქტიური პირები (PEP) და მათთან დაკავშირებული რისკები;

• ინფორმაციის მოძიება და დამუშავება ინტერნეტრესურსებისა და სხვა სანდო წყაროების გამოყენებით;

• ინფორმაციის კონფიდენციალურობის დაცვის პრინციპები;

• ანგარიშგების ფორმები და მონიტორინგის სამსახურთან დაკავშირებული პროცედურები;

• საქმისწარმოება, დოკუმენტების შენახვისა და დაარქივების წესები, მათ შორის ელექტრონული აღრიცხვა;

• AML სპეციალისტის, ოფიცრისა და მენეჯერის ფუნქციები და პასუხისმგებლობები;

• საერთაშორისო სანქციები, მათი მნიშვნელობა და სანქციების დამწესებელი ორგანიზაციები;

• კონკრეტული ქვეყნების მიმართ მოქმედი სანქციები და შესაბამისი ტიპოლოგიები;

• ტრანზაქციების მონიტორინგი და საეჭვო ოპერაციების გამოვლენა;

• საყურადღებო ნიშნები (Red Flags), საეჭვო ტრანზაქციების სცენარები და პრაქტიკული მაგალითები.

სწავლების მეთოდი:

კურსი ეფუძნება სწავლების ინტერაქციულ მეთოდს და აერთიანებს თეორიულ მომზადებასა და პრაქტიკულ სწავლებას.

სასწავლო პროცესი მოიცავს პრაქტიკულ სავარჯიშოებს, რეალური შემთხვევების განხილვას, სიმულაციებს, ანგარიშგების ორგანიზაციული მართვის საკითხებსა და დისკუსიებს.

მონაწილეები იმუშავებენ სხვადასხვა ტიპის ტრანზაქციის ანალიზზე, რისკების შეფასებაზე, საეჭვო ოპერაციების იდენტიფიცირებასა და AML რეგულაციების პრაქტიკულ გამოყენებაზე.

კურსის გავლის შემდეგ:

• გეცოდინება: ფულის გათეთრებისა და ტერორიზმის დაფინანსების აღკვეთის ძირითადი სამართლებრივი და პრაქტიკული მექანიზმები; კლიენტის იდენტიფიკაციისა და ვერიფიკაციის პროცედურები; რისკზე დაფუძნებული მიდგომის გამოყენება; ტრანზაქციების მონიტორინგი; საეჭვო ოპერაციების გამოვლენა; ანგარიშგების, დოკუმენტაციისა და საერთაშორისო სანქციებთან დაკავშირებული ძირითადი მოთხოვნები.

• შეძლებ: მიღებული ცოდნის პრაქტიკაში გამოყენებას, AML პროცედურების განხორციელებაში მონაწილეობას, ფინანსური რისკების შეფასებას, საეჭვო ტრანზაქციების იდენტიფიცირებასა და შესაბამისი დოკუმენტაციის მომზადებას.

• მიიღებ: კურსის დასრულების შემდეგ ჩატარდება ტესტირება, რომლის წარმატებით გავლის საფუძველზე მონაწილეები მიიღებენ ქართულ-ამერიკული უნივერსიტეტის (GAU) და საკონსულტაციო კომპანია Context Consulting-ის ერთობლივ, კვალიფიკაციის დამადასტურებელ სერტიფიკატს.

რეგისტრაცია:

კურსზე რეგისტრაციისთვის მსურველებმა უნდა შეავსონ სარეგისტრაციო ფორმა ან მიმართონ ქართულ-ამერიკულ უნივერსიტეტს მისამართზე: თბილისი, მერაბ ალექსიძის ქ. №10.

ჯგუფში ადგილები შეზღუდულია. უპირატესობა მიენიჭებათ აპლიკანტებს, რომლებიც განაცხადს პირველები წარადგენენ.

კურსზე სწავლა დაიწყება 20 ოქტომბერს!