თუ გსმენიათ ოდესმე გამოთქმა - “ერთი სურათი ათას სიტყვას უდრის” - ის 1910-იანი წლების ინგლისური გაზეთის რედაქტორს ტეს ფლანდერსს ეკუთვნის. თუკი მე-20 საუკუნეში ვიზუალი ასეთი მნიშვნელოვანი იყო, თანამედროვე სამყაროში მას კიდევ უფრო დიდი როლი ენიჭება.

დღეს ადამიანებს ძალიან დიდი მოცულობის ინფორმაციის ნაკადთან გვაქვს წვდომა, შესაბამისად, არ გვრჩება დრო რომელიმე ერთ საინფორმაციო წყაროზე კონცენტრაციისთვის. სწორედ ამიტომ, მნიშვნელოვანია ჩვენი სამიზნე აუდიტორიისთვის ინფორმაციის მიწოდების სწრაფი და გამორჩეული ხერხი მოვძებნოთ.

კომპლექსური იდეა, შეიძლება მხოლოდ ერთი გრაფიკული გამოსახულებით გამოიხატოს, რაც პირდაპირ ეხმაურება გრაფიკული დიზაინის დანიშნულებას. ვიზუალურ კომუნიკაციას, რომელიც, ძირითადად, ტექსტისა და სურათის ოსტატური და ჰარმონიული კომბინირებით დგება. სწორედ ამიტომ მიიჩნევენ გრაფიკული დიზაინის პროდუქტებს, ინფორმაციის გადმოცემის, ერთ-ერთ, ყველაზე სწრაფ და ეფექტურ საშუალებად.

დიზაინით და ამ სფეროში მუშაობით დაინტერესებული პირებისთვის 23 ივნისს (2016) ქართულ-ამერიკული უნივერსიტეტის (GAU) ინფორმატიკისა და ინჟინერიის სკოლის და ჯეოლაბის ორგანიზებით გაიმართა ლევან ასათიანის ღია ლექცია.

შეხვედრის ფარგლებში დამსწრე აუდიტორია გაეცნო გრაფიკული დიზაინის მნიშვნელობას და დანიშნულებას, მისი განვითარების ისტორიას და ყველა იმ ძირითად კომპონენტებს, რომლის მიხედვითაც იქმნება წარმატებული გრაფიკული დიზაინის პროდუქტი - კომპოზიცია, ფერთა ჰარმონია, ტიპოგრაფია, და რაც მთავარია, კომუნიკაცია.