ლევან ლორთქიფანიძე

ლევან ლორთქიფანიძემ წარჩინებით დაასრულა ივ.ჯავახიშვილის სახ. თბილისის სახელმწიფო უნივერსიტეტის (თსუ) სოციალურ და პოლიტიკურ მეცნიერებათა ფაკულტეტის ბაკალავრიატი, სადაც პოლიტიკის მეცნიერებასა და სოციოლოგიას სწავლობდა. წარჩინებით მოიპოვა თსუ-ის პოლიტიკის მეცნიერების მაგისტრის აკადემიური ხარისხი. ამჟამად სწავლობს თსუ-ის პოლიტიკის მეცნიერების დეპარტამენტის დოქტურანტურაში და მუშაობს დისერტაციაზე „საქართველოს პარტიული სისტემის ტრანსფორმაცია დამოუკიდებლობის მოპოვების შემდგომ პერიოდში“. მისი სამეცნიერო-კვლევითი ინტერესების საგანი გახლავთ: პარტიული პოლიტიკა და პარტიული სისტემები პოსტსაბჭოთა გარდაქმნის პირობებში, მემარცხენე მოძრაობების ისტორია და გერმანიის პოლიტიკური სისტემის შედარებითი ანალიზი.

2010-2016 წლებში იღებდა პრეზიდენტის, სახელმწიფო და საუნივერსიტეტო სტიპენდიებს.

ლევან ლორთქიფანიძე გახლავთ ორი ანთოლოგიური წიგნის ავტორ-შემდგენელი. 2015 წელს The National Endowment for Democracy (NED)-ის დაფინანსებით გამოიცა „ქართული მემარცხენეობის ქრესტომათიის“ პირველი ტომი, რომელიც XIX-XX საუკუნეების სოციალისტური პუბლიცისტიკის ნიმუშებს აერთიანებს. 2016 წელს კი მისი თანაავტორობით გამოქვეყნდა თარგმანთა კრებული „მწვანე ანთოლოგია. პოლიტიკა და ეკონომიკა მწვანეების თვალთახედვით“ (ჰაინრიჰ ბიოლის ფონდი).

ლევან ლორთქიფანიძე გახლავთ „კულტურულ ურთიერთობათა ცენტრ - კავკასიური სახლის“ თანამშრომელი, სადაც სახალხო უნივერსიტეტის სასწავლო პროგრამის შედგენაზეა პასუხისმგებელი. ლორთქიფანიძე წლების განავლობაში რედაქტორობდა სამოქალაქო განათლების ლექტორთა ასოციაციის სამეცნიერო-პოპულარულ ჟურნალ „სივიკუსს“.

მას მონაწილეობა აქვს მიღებული არაერთ ადგილობრივ თუ საერთაშორისო კონფერენციაში. 2014 წელს სასწავლო-სამეცნიერო ვიზიტით, ადგილობრივი კონფლიქტების შესწავლის მიზნით იმყოფებოდა კვიპროსის რესპუბლიკაში, 2016 წელს მოხსენებით წარსდგა „მწვანე აკადემიის“ სომხურ სესიაზე, 2017 წელს კი სიტყვით გამოვიდა „ევროპის მეექვსე ისტორიულ ფორუმზე“ (ბერლინი).