კარლო მათითაიშვილი

მედიცინის სკოლის დეკანის მოვალეობის შემსრულებელი

„მაქვს პატივი მოგესალმოთ მედიცინის სკოლის სახელით.

მოგეხსენებათ, მედიცინა სპეციალობებს შორის მოცულობით ყველაზე დიდია და ითხოვს დიდი რაოდენობის სქელტანიანი ლიტერატურის დამუშავებას როგორც სტუდენტობის დროს, ისე მთელი პროფესიული საქმიანობის განმავლობაში. მაგრამ, მიუხედავად არსებული მოსაზრებისა იგი რთული არ არის. რთულია მედიცინის სწავლება. განსაკუთრებით კი მისი თეორიული და პრაქტიკული ნაწილების ურთიერთდაკავშირება. ამიტომ ჩვენ შევქმენით პროგრამა, სადაც საბაზო და კლინიკური მედიცინა სრულად ინტეგრირებულია სწავლების ყველა საფეხურზე, ხოლო საფეხურებრივი, პრობლემაზე მორგებული  სწავლების მეთოდის გამოყენებით დიდი მოცულობის ინფორმაციის დამუშავება გავხადეთ მარტივი. რაც მთავარია, პროგრამა შექმნეს ექიმებმა და ის ხორციელდება მათ მიერვე, რაც იმას ნიშნავს, რომ თქვენ მედიცინას ყველა ეტაპზე ისწავლით იმ სპეციალისტებისგან, ვისაც ყოველდღიური შეხება აქვს დაავადებებთან და რომლებმაც ზუსტად იციან იმ ინფორმაციის ოდენობა და ფასი, რომელიც აუცილებელია პაციენტის მდგომარეობის წარმატებით სამართავად.

ჩვენთან არ გელით უბრალოდ მედიცინის სწავლება. ჩვენთან გელით დაუვიწყარი მოგზაურობა ადამიანის სხეულის მიკრო- და მაკროსამყაროში ყველაზე თანამედროვე სამედიცინო ლიტერატურის, მულტიმედიური საშუალებებისა და სამედიცინო სიმულატორების გამოყენებით, ჩვენთან გელით წამყვან კლინიკებში სრულფასოვანი მონაწილეობა რეალური კლინიკური ამოცანების გადაწყვეტაში და ყველა იმ სამედიცინო მანიპულაციის შესრულება, რომელიც აუცილებელია თქვენი მომავალი დამოუკიდებელი კლინიკური საქმიანობისთვის.

ჩვენი მიზანია მოვამზადოთ ექიმი, რომელმაც იცის არა მხოლოდ წამლის დანიშვნა ან მანიპულაციის შესრულება, არამედ, ესმის, თუ რატომ აკეთებს ამას, შეუძლია მედიცინის სამომავლო განვითარებაში მონაწილეობის მიღება და საერთაშორისო დონეზე კოლეგებთან თანასწორად კომუნიკაცია. მედიცინა თავისებური დაავადებაა და თუ დაავადდებით მედიცინით, ექიმობა მოგანიჭებთ დიდ სიამოვნებას. ეს ერთადერთი დაავადებაა, რომელიც ემსახურება სხვა დაავადებებისგან განკურნებას.

GAU, როგორც ხარისხის სტანდარტი განათლებაში და GAU-ს მედიცინის სკოლის სპეციალისტები მზად ვართ გაგატაროთ იმ ბილიკებზე, რომელიც ჩვენ უკვე გავიარეთ და ვიტოვებთ იმედს, რომ თქვენ გაკვალავთ ახალ გზებს მედიცინაში. ამისთვის თქვენგან გვჭირდება მხოლოდ მონდომება. სიამოვნებით, პირადად გავესაუბრები თითოეულ თქვენგანს მედიცინის ამ უნიკალური პროგრამის შესახებ. GAU-ს მედიცინის სკოლის კარი ყოველთვის ღიაა თქვენთვის.

გისურვებთ წარმატებას!“